საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ საყოფაცხოვრებო მომხმარებლის გაზიფიცირებულ ქსელზე მიერთების ახალი წესი შეიმუშავა. კომისიის შესაბამისი დადგენილების თანახმად, მომხმარებელს, რომელსაც სურს ქსელზე მიერთება, ეძლევა საშუალება მიერთების საფასური დაფაროს 24 თვის განმავლობაში და ყოველთვიურად  მხოლოდ 25 ლარი გადაიხადოს (დღგ-ს ჩათვლით).

გარდა ამისა, კომისიის დადგენილებით მომხმარებელს სხვა არჩევანის გაკეთების საშუალებაც ექნება - გადაიხადოს მიერთების საფასური ფაქტობრივი ხარჯთაღრიცხვის მიხედვით ან ერთჯერადად - არაუმეტეს 600 ლარისა. ამავე დადგენილების თანახმად, ბუნებრივი გაზის გამანაწილებელმა კომპანიამ ახალი საყოფაცხოვრებო მომხმარებლის გაზიფიცირებულ ქსელზე მიერთება, მათ შორის ტექნიკური პირობის მომზადება და ბუნებრივი გაზით მომარაგება, უნდა განახორციელოს ახალი საყოფაცხოვრებო მომხმარებლის შესაბამისი განაცხადის მიღებიდან 15 სამუშაო დღის ვადაში. 

ამასთანავე, კომპანია ვალდებულია, უზრუნველყოს ახალი საყოფაცხოვრებო მომხმარებლის ქსელზე მიერთებისათვის საჭირო ყველა სამუშაო და ხარჯი, მათ შორის ბუნებრივი გაზის აღრიცხვის კვანძისა და ახალი საყოფაცხოვრებო მომხმარებლის საცხოვრებელში ბუნებრივი გაზის მიღების ერთი წერტილის მოწყობა. 

საზოგადოებასთან და საერთაშორისო

ურთიერთობათა დეპარტამენტი